Í:kehre akwayentérha’ne ne riyateré:’a nè:ne tà:rawe Tsi yenaktóhares yotohétston. Kheyén:’a Zoe wa’akowirayén:ta’ne tsi tyakenheyontayentáhkwa Vancouver nón:we. Akwáh tsi rakowá:nen ne raksá:’a – thóha tyóhton nikaken’thserá:ke nihoya’tákste. Rotera’swí:yo tsi yah tha’tetsyakyatyé:ren ní:’i. Julian Forrest wahonwanà:tonhkwe. Enyórhen’ne é’tho yenyákene ne Yehnekiyóhstha ne káti enwá:ton ahshakyatkenhsè:ra. Tenhinonhwerá:ton ne ó:nen enhí:ken e’thò:ne enhihsén:non ne raohsenna’ón:we – Tehastaró:ken.

Karì:wehs - thóha tewenhnì:take - tsi náhe kenh wakhyá:ton. Né:'e aorì:wa akwáh í:ken tsi tewakeweyennhará:'on. Takatáhsawen akatenonhsón:ni. Kanonhsakétskwen nón:wa táhnon yoterhó:ron ne ahskwà:ke. Nón:wa, tká:konte akerhó:roke ahsonta’kéhson.
Táhnon ó:ni karì:wehs wakatéweyenhston tsi yakón:nis ne website. Táhnon nón:wa, wákhson ne website nè:ne Onkwawenna raotirihwà:ke (tsi nón:we kherihonnyén:nis). Satkenhsè:ra ne onkwawenna.info -- tsi nón:we enkhyá:ton oh niyohtonhátye ne yontaterihonnyennì:tha. Táhnon ó:ni satkenhsè:ra ne bb.onkwawenna.info – tsi nón:we enwá:ton "ayehthá:ren" ne onkwehonwenéha aorihwà:ke.

"Yakotatén:ron" kena’tónhkwa ne wathroryahtáhkwa tsi tkaya’tárha nè:ne yonkyon’wéhskwani ayakyateró:roke ne Yehnekiyohstha. Cook Islands nón:we niyawen’onhátye. Tóhkara niwén:take tsi náhe, tewáhsen nihá:ti Wahstonhró:non é’tho nón:we wahatì:teron. Teyotonhwentsyóhon tahontkén:ni ne káti yeská:konte ón:kwe kawehnà:ke ayèn:seke. Nè:ne enyakotatenrónhake tenyontèn:tsha ne énhska million nikahwíhstake.

Tsi tyotáhsawe, kayé:ri nikenytóhkwake wahonnón:ni nè:ne thonnónhtons – wisk nihá:ti ratihnará:ken skéntyohkwa ón:ton, wisk nihá:ti ratihnahòn:tsi skéntyohkwa ón:ton, wisk nihá:ti teharikahratí:ronte skéntyohkwa ón:ton táhnon wisk nihá:ti "Latino" nihatiya’tò:ten skéntyohkwa ón:ton. Nè:ne thonnónhtons rón:nehre ne káti niya’teyonkwè:take ratiyà:tare – nek tsi yah ónhka onkwehón:we é’tho tehón:ne’s!

Yawehronhátye, shé:kon yakeninòn:we’s ne Yakotatén:ron. Yah thaón:ton í:’i akkwé:ni takatèn:tsha nek tsi orihwí:yo ki’ ná:’a, ónhte í:kehre ayekwé:ni tayontèn:tsha ne Yehnekiyohstha né:’e aorì:wa akwé:kon ayontatenòn:we’ne.

Yonhwéntsyare ne kí:ken nè:ne wa’ketshén:ri karonwarà:ke Google Earth nón:we. Akwáh í:ken tsi kenòn:we’s ne Google Earth (earth.google.com). Enwá:ton wenhniserakwé:kon akatkà:rihte. Wa’ketshén:ri tsi nón:we tyakenì:teron ne Yehnekiyohstha. Enwá:ton ayontkáhtho tsi tyonkeninónhsote ne kèn:tho, atysà:kta nón:we. Enwá:ton ayontkáhtho entyè:ke nonká:ti tsi nón:we thatì:teron ne yonkyén:’a táhnon khe’kén:’a nok yontatyen’okón:’a. Tsi tkarahkwínekenhs nonká:ti enwá:ton ayontkáhtho tsi tyakonónhsote ne onkyarasé:’a nè:ne teyakwanonhsané:ken.

Sha’tewahsén:nen nón:we tsi tyonkeninónhsote nok yonkyen’néha, wa’kyà:tarahste tsi nón:we á:se enkatenonhsón:ni. Ó:nen tewakatáhsawe. Wa’akwahswen’kará:yen táhnon tóhkara niwahsónhtake wa’akyón:ni.

Yawentatokénhti nón:wa. Wa’onkwayó’ten thetén:re táhnon ohstón:ha wakya’tanón:waks (né:’e aorì:wa ohstón:ha tewakeksten’onhátye). Yawehronhátye, wenhniserí:yo nón:wa, e’thóhtsi aonkyo’ténhsera takahsónteron tsi katenonhsón:nis.

Akwé:kon ronwayenté:ri ne Tony Soprano, nè:ne raya’takwe’ní:yo ne The Sopranos tsi tkaya’tárha. Tókat yah tetshyenté:ri ne raónha, enkwahró:ri ne kí:ken:

Soprano ronwatí:yats ne kahwá:tsire ne Tarienhá:ka nè:ne New Jersey ratinákere. Tony rotinyá:kon ne Carmella táhnon Anthony nok Meadow ronwatí:yats ne ronwatiyen’okón:’a.
Yah tehronkwe’tí:yo ne Tony – ranénhskwas táhnon shakóryos – nek tsi rohsté:rihst. Thiya’teká:konte tsi ok nahò:ten nihatyérha nè:ne yah teyoyánere nek tsi shé:kon ikhsteríhstha.

Raya’takwe’ní:yo ne kentyóhkwa ne ronnonkwe’táksens ne Tony táhnon ó:ya shithetén:re wahotitó:kenhse ne kentyohkwakwé:kon tsi rótewe ne shayà:ta nè:ne rayà:tare ne kentyóhkwa nè:ne Vito ronwá:yats. (Rótewe: shayà:ta nè:ne raon’wéhskwani ahotítahwe ne ó:ya rón:kwe.) Akwé:kon rotinehrákwen ahotitó:kenhse tsi rótewe ne Vito né:’e aorì:wa ronyá:kon táhnon roksà:tayen. Kentyohkwakwé:kon ronwatíhswenhs nè:ne ronátewe, akwé:kon rotina’khwén:’on táhnon akwé:kon rón:nehre ahonwáryo ne Vito, yah né:’e Tony.

Vito roteryèn:tare tsi akwé:kon ronwatíhswenhs nè:ne ronatewe, táhnon hotina’khwen’ónhake. Tsi na’teho’nikónrhare tsi ahonwáryo, wahatáhsete othoré:ke nonká:ti.

Tyóhtkon tehontatkwénnyons ne ronnonkwe’táksens ne ó:nen tehontátkens táhnon yo’shátste wa’khsté:rihste ne ó:nen shayà:ta ronkwe’táksen wahorihwanón:tonhse ne Tony, "Entshekwénnyon ken ne Vito ne ó:nen tenthoké:tote?"

Sheyatkáhtho ne kheyateré:’a! Tókat ó:ni etsheyatkáhtho ne riyateré:’a! Kayà:tare ne owirá:’a nè:ne enyakoyén:ta’ne ne kheyén:’a Zoe. Wa’ontatyà:tarahste ne owirá:’a ó:ya shisewén:te táhnon wa’onkwaténnyehte. Enwá:ton ayakotó:kenhse tókat raksá:’a tókat ó:ni yeksá:’a enkénhake nek tsi yah nón:wa té:yenhre ahshakotihró:ri.

Yah tewakè:ron akatkáhtho ne kayà:tare ne ó:nen onkyén:ta’ne nek tsi onkenehrá:ko ne ó:nen wa’onkena’tón:hahse ne Yehnekiyohstha. Yohnerákwat! Yakoyéhson! Yakotáhskats! Enwá:ton ayonttókha akwé:kon yekonhsà:ke nok yesnonhsà:ke! Wè:ne tsi yakaon’wéhskwani yeyà:takon ayèn:seke ne ako’nihsténha. Éntyenwe ne Kentenhkó:wa ne owirá:’a -- kheyateré:’a!

Thonatáhsawe tehontkén:nis ne Minto Cup ne Six Nations Arrows Express. Tahontyé:renhte ne akwé:kon kentyóhkwahshón:’a Ontario nón:we ne Arrows tsi niwakennheskénha. E’thò:ne ó:nen wahshakotikwé:ni áhsen nikentyóhkwake nè:ne Kitchener-Waterloo, Orangeville táhnon Peterborough nithoné:non. Nón:wa tehontkén:nis ne áhsen nikentyóhkwake -- Peterborough, Edmonton nok Burnaby tsi tehonttsihkwa:’ékstha Ohsweken nón:we.

Tahontáhsawen tsi tehontkén:nis tewahsón:take tsi náhe. Burnaby nok Arrows wa’thontkén:ni táhnon Burnaby wahshakotikwé:ni ne Arrows 10-9. Tenshonttsihkwa:’eke á:re enyórhen’ne enyò:karahwe. Peterborough, nè:ne ó:nen shakotikwényon tewén:take tsi náhe, tenhontkén:ni.

Wa’akyateró:roke ó:ys shiyò:karahs ne Yehnekiyohstha táhnon enyakyaterorókha niya’tekahá:wi ne ó:nen tenhontsihkwá:’eke ne Arrows. Enyethihretsyá:ron ne Arrows né:’e aorì:wa yákenehre é’tho enyakenè:seke ne ó:nen tenhontèn:tsha ne Minto Cup.

Sewahkwíhsron Arrows!

Karì:wehs tsi náhe wakhyá:ton ne kèn:tho, né:’e aorì:wa é:so niwakya’tawén:’on táhnon akwáh í:ken tsi tewakeweyennhá:rahkwe. (Wè:ne tsi yah tewakeyénnhare nón:wa.)

Tyoterénhton enkathró:ri ohstón:ha tsi na’á:wen’ne tsi rotinyá:kon ne kheyén:’a Zoe nok Marty. "Kanonhséhsne" U.B.C. nón:we wahotínyake. Átste wahotínyake táhnon akwáh í:ken tsi wenhniseriyóhne. Sha’tewahsén:nen Cree nihaonhwentsyò:ten ne Marty, nè:ne ronohá:’a wahaterihwahténtya’te tsi nihotirihò:ten ne Creehá:ka.

Ne ó:nen wahshakohró:ri ne káti rotinyá:kon, táhnon nikarihwéhsha ká:ron tsi niyó:re wa’thnikwénnyon, wa’eyà:tarahste ne kí:ken ne akhtsikhè:ta:

Tékeni tewen’nyá:wer niyákyon e’tho yeyákwe’skwe – Teyonkenirihwayá:kon Yehnekiyohstha, yonkyén:’a, khekén’okón:’a Marilyn, Brenda nok Velma, táhnon tóhkara nihá:ti kheyonhwaten’okón:’a. Táhnon ó:ni, é:so nihá:ti ne Waglislahró:non yehón:ne’skwe. (E’tho wa’onnákerate ne Zoe táhnon é’tho nihoné:non ne ako’nihsténha akohwá:tsire.) Táhnon é:so nihá:ti ne Marty tehontátenonhkwe – ronwayén:’a, tehontate’kén:’a táhnon ronarase’okón:’a. Táhnon é:so nihá:ti ne ronatenrohshón:’a ne Zoe nok Marty.

Thó:ha ratikwé:kon ne Waglisahró:non ratitsyayé:nas tsi ronnehkwa. Niya’tekéntysake tahatíhawe táhnon wahatí:rihte ne káti tayakwatskà:ton tsi rotinyá:kon. Akwáh í:ken tsi yawekon’òn:ne.

Ne ó:nen akwé:kon wa’akwakhwén:ta’ne, táhnon ne ó:nen akwé:kon wahatíhsa tsi rotíhthare, tayakwatáhsawen tsi teyakwanonnyáhkwa. Yah tehonwatinhá:’on ne kentyóhkwa ne ronterennótha Marty nok Zoe. Niweyénhen tsi yaterennótha ne Zoe nok Marty (raya’takwe’niyóhne ne Marty nè:ne rotyohkwayén:tahkwe nè:ne Breach of Trust rana’tónhkwa). E’tho káti é:so nihá:ti ne ronatenronhsón:’a wahonterennó:ten shiwahsón:te. Táhnon ó:ni skarén:na nè:ne kanoronhkwà:tshera aorihwà:ke skáhne wahyaterennó:ten ne Marty nok Zoe – akwáh nè:ne Sawatis Ohwihsta nok ró:ne June Carter:

Teyontyerónnyons nè:ne Sarah Carter yontátyats yeyà:tare. Karonwarà:ke wa'ketshén:ri, gofugyourself.typepad.com/ nón:we. (Skaweyentetáhkwen nonká:ti ne kèn:tho, wakhyá:ton ne kahsennahshón:’a nè:ne kahyatonhserahshón:’a nè:ne karonwarà:ke né:’e aonhá:’a tkenòn:we’s. Ehtà:ke nón:we aotihsén:na kahyá:ton.)

Tekeniyáhsen tekenón:kwe kenihyá:tons ne "Go Fug Yourself" táhnon í:kehre aesewató:kenhse tsi niyohsté:rihst nen’ né:’e. Niya’tewenhniserá:ke kenirákwas ne kayà:tare ne yeya’taséha nè:ne yakohsennowá:nen (nek tsi yah tekheyenté:ri ne Sarah Carter) táhnon yonon’wéhskwani akenì:ron tsi niwahétken ne akohkwénnya nè:ne yakotstonhátye. Ne kèn:tho, wa’kenihsté:rihste ne Sarah akotya’tánha táhnon akotyà:tawi. Akwáh í:ken tsi yohsté:rihst nè:ne Sarah akorihwà:ke táhnon akwé:kon ó:ya nè:ne yotihyá:ton. (Enwá:ton akate’nyén:ten takewennaté:ni ne Sarah akorihwà:ke, nek tsi sénha ayohsteríhstake ayontaterihónnyen ne o’seronni’kéha.)

E’thótsi ahsátkenhse ne aotihyatónhsera -- tóhske ki’ wáhi enhsenòn:we’ne.

Kheksténha nok ronwa’kén:’a Don niyà:tare ne kí:ken. Skayà:ta otsi’era’kó:wa ráhawe ne Don nè:ne wa’akwayé:na kanyatarà:ke ákta tsi thanákere Washington State nón:we. Skáhne thnì:teron Don táhnon rohtsí:’a Rick. É’tho wa’akhinatarè:nahse shisewente’kénha.

Rotihón:wayen táhnon Don yahshonkwaya’ténhawe ayakwayé:na ne otsi’era’kó:wa. Onktó:kenhse ne káti yah tewatyè:sen. Wenhniserakwé:kon kanyatarà:ke yeyákwe’skwe. Thóha énhska tewen’nyáwe nikón:ti wa’akwayé:na táhnon ne ok ne wisk nikón:ti wa’akwaterá:ko. Teyotonhwentsyóhon awèn:ke yaonsayonkwá:ti á:re ne aorì:wa sótsi nikonnà:sas.

Yah tewatè:sen ayeyé:na ne otsi’era’ó:wa nek tsi tó:kenhske ón:we yawékon.

Wa'akwakwátho tsi nón:we wa’ontatya’táta ne Pauline Johnson shiyákwe’skwe Vancouver nón:we ne kheksténha nok ako’nihsténha ó:ya shithetén:re. Yonén:yote é’tho nón:we nè:ne shakotihsennaráhston nakohsén:na táhnon shakotiya’taráhston yekónhshne onenyà:ke. Yon’wè:sen é’tho nón:we.

Ne ok ne nikarihwéhsha yeyákwe’skwe e’thò:ne Wahstonhronòn:ke tayákwehte, tsi tkaná:tayen nè:ne Marysville yena’tónhkwa. (Shé:kon kenh yákwe’s nón:wa.) Kén:’en nì:teron ne tehniyáhsen tehyatate’kén:’a ne Yehnekiyohstha, nè:ne Rick nok Donny ronwatí:yats. Kenh tayakhiya’ténhawe ó:ni ne Yehnekiyohstha ako’nihsténha táhnon akwé:kon ronatshennón:ni taonsahontátken á:re.

Yakhón:ni ne onenhstóhkwa nón:wa ne aktsikhè:ta, nè:ne akwáh í:ken tsi roné:kahs ne Rick nok Donny. Enyórhen’ne enyakwate’nyén:ten ayakwayé:ne ne otsi’era’kó:wa nè:ne awèn:ke kontinákere.

Yah nón:wa thaón:ton takahnanéta ne kaya’tarónnyon nè:ne wa’kyà:tarahste ne ó:nen wahotínyake ne Zoe nok Marty ó:ya shithtetén:re. Enkwahró:ri oh niyohtòn:ne táhnon enkwana’tón:hahse ne kaya’tarónnyon ne ó:nen yénskewe á:re.

Vancouver yenyákene ne kheksténha enyórhen’ne. Enyakhiyaterò:roke ayakónyake ne kheyén:’a Zoe. Enhotínyake shayà:ta nè:ne Marty ronwá:yats nè:ne skáhne tehnì:teron áhsen niyohserá:ke nikarì:wehs. Saskatchewan nithawé:non táhnon sha’tewashén:nen Cree nihaonhwentsyò:ten. Ronkwe’tí:yo táhnon akwáh í:ken tsi rinòn:we’s. Ó:nen roti’nikonhrí:yo ne tehniyáhsen táhnon ónhte í:kehre enhonatshennonníhake.

Tsi Yenaktóhares okarahsnéha yenyákenewe é’tho nón:we. (Sonke’nikónrhen – Yehnekiyohstha ako’nihsténha ó:ni é’tho yén:yen.)

Ayá:wenhs ne káti enwá:ton ohstón:ha akatoríshen ne Yawentatokenhtì:ke né:’e aorì:wa akwáh tsi tewakhwihshenhé:yon. (Tewén:take nikarì:wehs wa’kherihónnyen Kawenniyo nón:we tsi niwenhníserehs, e’thò:ne teyotonhwentsyóhon aonkyó’tenhsera Onkwawenna nón:we.)

E’thò:ne Yawententá:’on niwenhniserò:ten, enhotínyake ne Zoe nok Marty. (Yah teyotón:hon ahyatenníha ne kanónhsa tsi na’tekyatentátere.) E’tho yénkhawe ne yontya’tarahstáhkwa táhnon énkyehste ne kaya’tarónnyon ne ó:nen shé:kon á:re enskhyá:ton ne kèn:tho.

Én:katste kaya’tarónnyon akwáh nè:ne ne kí:ken akherihónnyen ne Kanyen’kéha ne Sehske’kó:wa tá:we.

Yà:yak niyohserá:ke nikarì:wehs kherihonnyén:ni Onkwawennà:ke nón:we táhnon tenkté:ni tsi ní:yoht enkherihónnyen. Áhsen niwenhnì:take tsi náhe, wakateweyenhstanòn:ne tsi ní:yoht shakorihonnyén:nis ne onkyatén:ron Steven Greymorning. Akwáh i:ken tsi tekyattíhen tsi ní:yoht niyakeniyérha nek tsi akwáh ón:we tsi kenòn:we’s ne raorì:wa. Enkheyate’nyén:tenhste ne kentyóhkwase táhnon ayá:wenhs ne káti sénha enwatye’sénhake ahoti’nikonhrayén:ta’ne táhnon ahontá:ti.

Kenh ní:yoht én:katste ne kayà:tare: tyoterénhton enkhena’tón:hahse ne kentyóhkwa ne kayà:tare táhnon enkherihónnyen tsi ní:yoht ahonnì:ron "rakśa:’a." Ne ó:nen akwé:kon ratiwennayenté:ri ne "raksá:’a," e’thò:ne enkherihónnyen tsi ní:yoht ahonnì:ron ne "ratákhe ne raksá:’a." Táhnon ne ó:nen akwé:kon ratiwennayenté:ri ne "ratákhe ne raksá:’a," e’thò:ne enkherihónnyen tsi ní:yoht ahonnì:ron ne "onhwentsyà:ke ratákhe ne raksá:’a."

Yah thá:katste ne O’seronni’kéha táhnon yah tha’teyotonhwentsyohónhake othé:nen ahatihyá:ton tókat ó:ni ahontaterihónnyen. Sha’teyohserí:hen nikahá:wi, entkatáhsawen akherihónnyen ne kayaneren’tshera’shón:’a ne Kanyen’kehaka nikawennò:ten táhnon ó:ni enkherihónnyen tsi ní:yoht ayehyá:ton táhnon ayontaterihónnyen ne owén:na.

É’tho ní:yoht enkate’nyén:ten akherihónnyen ne tsyóhsera tá:we. Ayá:wenhs ne káti enkakwé:ni.

Tsi tehatikahratí:ronte yeyakawé:non ne kheyonhwatén:’a Laurie. Ó:nen yakoteweyénhsthon tsi ní:yoht yontaterihonnyén:nis tsi yontaweya’táhkwa. Táhnon é’tho nón:we enyontéweyenhste tsi yontaterihonnyén:nis. Sewenhnì:ta nikarì:wehs enyontaterihónnyen ne eksa’okón:’a tsi tkaná:tayen Shanghai yena’tónhkwa, e’thò:ne enyenatà:ra Beijing, nè:ne kanaktakwe’ní:yo Tsi tehatikahratí:ronte.

Enwá:ton ayonkerihónnyen ohstón:ha Tehatikahratironte na’kawennò:ten ne ó:nen tontá:yenwe, nek tsi í:’i enkherihónnyen ne Kanyen’kehaka na’kawennò:ten ne aorì:wa enyontaweya’tà:na Onkwawennà:ke ne Sehske’kó:wa.

Thetén:re wa’akwaterihwahténtya’te ne niyohontéhsha nikahá:wi Kanyen’kehaka Kanonhsehs nón:we. Nè:ne tyoterénhton nikahá:wi nè:ne wa’ákwatste ne kanónhsehs ayakwaterihwahténtya’te. Shé:kon yah teyóhson kanónhsakon, yah yeyonkwanitskwahra’tsherá:yen, yaweronhátye shé:kon sénha yon’wè:sen tsi ní:yoht ne ayakwaterihwahténtya’te átste nón:we. (Kayé:ri niyohserá:ke wa’akwaterihwahténtya’te ne niyohontéhsha nikahá:wi átste nón:we. Wa’okén:nore ó:ya shiyò:karahs táhnon tayotonhwentsyohónhake onawatsà:ke tayakwanónnyahkwe.) Ónhte í:kehre ne káti yà:yak niwáhsen nihá:ti yehón:ne’skwe. Kentyohkwí:yo ne aorì:wa Wískhaton nen’ né:’e.

Yohsnó:re wa’akyatkétsko ne Yehnekiyohstha – tsyá:tak niyohwihstá:’e ya’ákenewe kanonhséhsne. Teyotonhwentsyóhon ayontkátston táhnon ayehnekón:ni ne niyohontéhsha wahyakerì:ton. Ronateríhonte ne ronnón:kwe ahatitsyénhayen táhnon é’tho nákyere.

Ne ó:nen akwé:kon yoterihwíson, wa’tyakyatotárho tsi tyonkeninónhsote tsi niyó:re ya’káhewe ayakyaterohrókha tsi tehontsihkwá:’eks. (Yah tehonatkwényon ne Arrows.)

Yohsnó:re wa’onkenitáhwha – teyonkenihwihshenheyónhne nek tsi akwáh í:ken tsi yonkeni’nikonhrí:yo.

Onkyó'ten tsi tkawennárha sha’onterò:roke ne Canadian Idol tsi tkaya’tárha. Énhska yawén:re nihá:ti wahonterennó:ten táhnon shayà:ta rayà:tare nè:ne ronkwehón:we. Sheldon Elter ronwá:yats táhnon Edmonton nithawé:non. Wahaterennó:ten ne karén:na nè:ne yah ónhka tehatiyenté:ri. Yah eh sótsi tewakenonhwé:’on tsi ní:yoht wahaterennó:ten. Yehnekiyohstha yah teyakononhwé:’on ne raorén:na nek tsi wa’enòn:we’ne tsi ní:yoht raterennótha. É’tho káti wahonwahsén:narahste karonwarà:ke -- oyé:ri nónteratste. E’thò:ne wa’ontatewennáta’ahse ne yontate’kén:’a táhnon wa’ontathró:ri akaónha ó:ni ahonwahsén:narahste.

Glacier National Park

Teyó:yaks nè:ne "An Inconvenient Truth" nityawé:non ne kí:ken kayà:tare. Akwáh í:ken tsi yoyánere ne teyó:yaks, AKWÁH Í:KEN. Sénha é:so enkathró:ri wá’tsyok niyá:re. Wa’kì:ron ken tsi akwáh í:ken tsi yoyánere?

Al Gore, nè:ne George Bush wahokwé:ni 2000 shiyohserá:te Ranatakaryahs ahá:ton, wahrón:ni ne teyó:yaks. Wa’akyaterò:roke ó:ya shiyò:karahs ne Yehnekiyohstha táhnon wa’kwahretsyá:ron sewakwé:kon aesewaterò:roke.

Tsi niyo’tarihenhátye tsi yonhwentsyá:te aorihwà:ke ne teyó:yaks. Wà:kehre ne káti é:so kyenté:ri nek tsi onkehnerá:ko tsi nahò:ten yah tewakateryèn:tarahkwe. Oh né:’e akwáh ónhte yako’nikonhrórya’t.

Yóhteron, ki’ ná:’a, tsi ní:yoht akwé:kon tenkaté:ni onhwentsyà:ke táhnon yohsnó:re nenyá:wen’ne. É:so onktó:kenhse táhnon sénha ó:ya í:kehre akerihwatshén:ri.

Wa'onkhyá:tonhse ne kí:ken kahyatónhsera ne khe’kén:’a Dennise shiyé:yen’skwe Budapest nón:we tewén:take tsi náhe. Onhwentsyakayòn:ne wa’tyontawénrye oyé:ri niwenhniserá:ke nikarì:wehs táhnon áhsen nikaná:take wa’enatà:ra -- Budapest, Rome nok Paris. (Yah nonwén:ton thiyé:ke’skwe ne Budapest nek tsi wè:ne tsi é:so nihotinónhsayen ne yonterennayentáhkwa.)

Ne kí:ken wa’ehyá:ton ne kahyatonhserà:ke: "Akwáh í:ken tsi wakon’wéhskwani ne kèn:tho. É:so niwakya’tarahstonhátye. Yah tekonhwentsyí:saks ne Ohsweken nek tsi kheya’tí:saks ne ón:kwe é’tho thatinákere. Shehró:ri ’shé:kon’ ne akwé:kon. Kanoronhkwà:tshera, Dennise."

Onkyatén:ro Ron George ne kí:ken. Thó:ha áhsen niwáhsen wisk niyohserá:ke teyakyatatyenté:ri. Skáhne yonkeniyó’tehkwe Vancouver nón:we. Wet’suwet’en nihaonhwentsyò:ten táhnon othorè:ke nonká:ti ne British Columbia nithoné:non ne raohwá:tsire. Táhnon raya’tákta í:yete ne ro’nihsténha Mabel, nè:ne sha’té:kon niwáhsen na’teyakaohseriyà:kon. Wahonwayà:tarahste ó:ya shithetén:re ne ó:nen wahoyén:ta’ne ne Bachelor of Social Work na’kahyatonhserò:ten nè:ne University of Victoria nón:we. Enshataweya’tà:na ne Sehske’kó:wa ne káti ì:rehre tahatèn:tsha ne Master’s na’kahyatonserò:ten.

Í:kehre akwayentérha’ne ne kheyén:’a Zoe. Nek ne tsyeyà:ta wakewí:rayen táhnon áhsen niwáhsen énhska na’teyakaohseriyà:kon. Yah teyakowí:rayen - yah árekho. Yené:ron nón:wa táhnon enyakowirayén:ta’ne ne Kentenhkó:wa nenwenhni’to’ténhake. Vancouver thninákere ne tehotirihwayenawà:kon Marty. Tóhkara niyohserá:ke nikarì:wehs skáhne thnì:teron táhnon enhotínyake ne Ohyari’kó:wa nenwenhni’to’ténhake Vancouver nón:we.

Akwé:kon yonkwatonnháhere ne akhwá:tsire nè:ne Zoe akorihwà:ke. É’tho yenyákene ne Yehnekiyohstha ne ó:nen enhotínyake táhnon khé:re nón:wa é’tho nón:we yentsyákene ne ó:nen enyakowirayén:ta’ne.

Kén:’en í:yen’skwe shisewentehkénha. Yonkwatshennón:ni aonsayakhí:ken á:re. Karí:wehs skáhne yákene’skwe táhnon é:so wa’tyakenihthá:ren. Kheya’tí:saks nón:wa nek tsi wakateryèn:tare ne káti yohsnó:re ensekhé:ken á:re.

Kí:ken ranekénhteron rayà:tare ne teyó:yaks nè:ne "One-Eyed Dogs Are Free" yena’tónhkwa. Nikakaréhsha ne teyó:yaks, nek ne wisk yawén:re nikahí:kare nikarì:wehs. Tsi tkarón:to wa’akwaterò:roke ó:ya shiyò:karahs. Tékeni yawén:re ní:kon teyó:yaks wa’akwaterò:roke ne Kayeríhaton yotohétston, nè:ne karónnyon ne "Worldwide Short Film Festival." Wa’akwaterò:roke teyó:yaks nè:ne Norway, Germany, France, Wahstonhronòn:ke táhnon akwáh tsi ok nón:we Koráhne nityoné:non. Ne ok ne énhska teyó:yaks í:kare ne W.S.F.F. nè:ne yakaón:ni ne onkwehón:we. "One-Eyed Dogs Are Free" nén’ né:’e táhnon wakatshennón:ni akì:ron ne káti kheyén:’a Zoe wa’akón:ni.
Vancouver tyenákere ne Zoe táhnon kén:’en tá:yenwe shisewén:te ayonterohrókha ne W.S.F.F. Wa’onnòn:wete tsi tyonkeninónhsote ne teyonkenirihwayenawà:kon tóhkara niwenhniserá:ke táhnon akwáh í:ken tsi wakatonnháhere aonsakhé:ken á:re. Shé:kon á:re enskheyathró:ri enyórhen’ne.

Yah ní:’i té:ken ne kí:ken. Yeyà:tare ne Yehnekiyohstha nè:ne yakoya’taráhston ne yontatateré:’a Ruby nè:ne Minnesota tyenákere. Sha’té:kon na’teyakaohseriyà:kon táhnon yakon’wéhskwani tsi yeya’taráhstha. Tókat ahskwátho tsi tyonkeninónhsote, enwá:ton ahsatkáhtho kaya’tarónnyon eksa’néha nè:ne yakoya’taráhston akwáh tsi ok nón:we ahsonhta’kéhson táhnon kanhoha’kéhson yorenhtónnyon.

Akwáh í:ken tsi tewakeweyennhá:rahkwe thetén:re. Yohsnó:re wa’katkétsko, wa’tkatskà:hon e’thò:ne wa’katkennihsà:na tsi nón:we ronatkenníhson ne rotiyaneréhson. É:so nihá:ti yehón:ne’skwe táhnon ó:ni Elijah Harper, nè:ne raya’tá:rahkwe ne kakoráhthsera ne Manitoba táhnon Korahne. Akwé:kon wa’tyakhinonhwerá:ton e’thò:ne ohstón:ha wahatá:ti. Wahshakorénhsaron táhnon wahshakohretsyá:ron ne rotiyaneréhson tahontonsonterónnyon. E’thò:ne wahonthró:ri oh niyawen’onhátye Tsyonennohkaráhne ńon:we. Wa’katahónhsatate tsi tehatiya’toréhtha tsi niyó:re áhsen sha’tewahsén:nen niyohwihstá:’e. E’thò:ne Kanyen’kehá:ka Kanónhses yahá:kehte. Takatáhsawen akhserón:ni ne kahswèn:kara nè:ne tenyonkwatonhwéntsyohse ayakwarhò:roke è:neken ahskwà:ke. Wà:kya’ke ne kahswèn:kara tsi nón:we yokà:ronte tókat ó:ni yohetkén:’on. Onkyatén:ro Rathahonni tahoké:tote táhnon wahakyé:nawa’se. Sakahtén:ti ne yà:yak sha’tewahsén:nen niyohwihstá:’e táhnon takatáhsawen akhserón:ni ne onhwéntsya tsi nón:we enkyéntho nè:ne tyonnhehkwen. Wa’tekahwihstá:’eke tsi wa’tkonhwentsyarihtányon táhnon thóha tyóhton niyohwihstá:’e wà:khsa.

Wa’tyakyatskà:hon ne Yehnekiyóhstha (wa’ekhón:ni) táhnon wa’keksoharényon ní:’i. E’thò:ne onkyó’ten tsi tkawennárha tsi niyó:re ahsónhthen. Akwáh í:ken tsi tewakhwihshenheyónhne táhnon wake’nikonhrí:yo ne ó:nen onkitáhwha.

Sénha enwatyesénhake ayontaterihónnyen tókat ahstsihkwà:reke ne kayà:tare.

Tókat ahskwátho tsi tyonkeninónhsote, enwá:ton ahsatkáhtho ne kí:ken tsi yekhonnyà:tha ahsonhtà:ke yohrèn:ton. Wa'kón:ni sha'té:kon niyohserá:ke tsi náhe. É'tho shikahá:wi, yah skáhne teyakeni’terón:tahkwe ne Yehnekiyóhstha nè:ne teyonkenirihwayenwà:kon nón:wa. Skáhne keni’terón:tahkwe ne Yehnekiyóhstha nok akohtsí:’a. Akonhatsí:wa ki’terón:tahkwe tsi tewakenónhsote.

Wà:kehre skáhne ayakeni’terón:take ne Yehnekiyóhstha, é’tho káti wa’kherihwanón:tonhse táhnon tayerihwaserá:ko, wa’aì:ron: "Tókat íhsehre kén:’en takená:tahkwe, tká:konte ahshní:non ne yenontekhsyonstáhkwa nè:ne ka’shatstensherá:wis. Nek ne orihwakayon’néha í:se sá:yen táhnon yah tekenòn:we’s tsi kátstha."

Orihwí:yo ki ná:’a, wà:kehre skáhne ayakeni’terón:take é’tho káti yohsnó:re wa’kathón:tate. E’thò:ne wa’tyená:tahkwe tsi tewakenónhsote táhnon wa’akhihón:karon onkenihwá:tsire aontayakwaten’nyotà:na. Akohwá:tsire nok akhwá:tsire kenh rón:ne’skwe. E’thò:ne takhé:yon nikaronto’sherá:’a nè:ne í:wat thiyenontekhsyonstáhkwa nè:ne è:neken kayà:tare. Wa’enhotón:ko, tayetáhko, táhnon akwé:kon wa’akwahsté:rihste, Yehnekioyóhstha ó:ni. E’thò:ne wa’khehró:ri tsi akhehní:nonhse ne yenontekhsyonstáhkwa nè:ne á:se, kanó:ron táhnon ka’shatstenhserá:wis.

Táhnon nón:wa, onkyahsonhtà:ke yohrèn:ton thiyenontekhsyonstáhkwa táhnon Yehnekiyóhstha yakaon’wéhskwani tsi yóntstha ne yontenontekhsyonstáhkwa nè:ne ka’shatstensherá:wis.

Ó:nen yeyóhe aetewayéntho nè:ne tyonnhéhkwen. Ohyaríha niwenhni’tò:ten nón:wa -- yo’taríhen, yoráhkote, wenhniserí:yo (táhnon ó:ni okarya’tà:ne nok ohséhton kontinákere; yohsnó:re yotón:ni ne óhonte nok kahonta’ksen).

Í:kehre akyéntho nek tsi yah é:so tewakenáktote. Akwáh í:ken tsi tewakeweyénnhare tsi tewakyó’te táhnon ó:nen tewakatáhsawe tsi katenonhsón:nis. Takyerónnite onhwentsyà:ke ón:wa wenhniserá:te tsi nón:we enkatenonhsakétsko. Enyórhen’ne entkatáhsawen tsi
keróntya’ks.

Akwáh í:ken tsi tenwakeweyennhá:rake tsi niwakénnhehs, é’tho wakateryèn:tare. Yawehronhátye, ayá:wenhse enwakenaktó:take akonhwentsyakarhátho tsi na’tekyatentátere tá:we -- ahse’kén yah othé:nen sénha tewaké:kahs tsi ní:yoht ne á:se teyohyakháhon.

Yonkyaterohrokónhne ne Davinci Code ó:ya shiyò:karahs. Á:kehre akwahró:ri oh na’á:wen’ne, nek tsi yah thakkwé:ni ahse’kén yohsnó:re onkí:tahwe tsi tyotáhsawe ne teyó:yaks. Sha’tewahsén:nen ne oká:ra sakátewahte. Táhnon -- tsi nahò:ten wa’katerò:roke, yah tewake’nikonhrayentá:’on. Oh né:’e akwáh ónhte!

Aktsikhè:ta ne kí:ken táhnon íkehre akathró:ri tsi niyeweyén:te ne akaónha. Enwá:ton ahsatkáhtho tsi yeweyén:te tsi yekwatákwas ne kawennárha. Táhnon ó:ni .... yeweyén:te tsi teyenonnyáhkwa – o’seronni’néha táhnon onkwehonwehnéha. Yeweyén:te tsi yonterennótha ne onkwehonwehnéha nè:ne Rotinonhsyón:ni táhnon ronatya’kè:son. Yeweyén:te tsi yenonhkwa’tsherón:nis. Yeweyén:te tsi ye’níkhons – yakón:nis akwé:kon akwahtsheronnyà:tshera ne onkwehonwehnéha. Yeweyén:te tsi yena’tarón:nis, tsi yontkátstons – akwáh í:ken tsi yekhwaweyénhen. Yeweyén:te tsi yonnisnonhsawi’tsherón:nis. Yeweyén:te tsi ye’tarón:nis ó:ni. Yeweyén:te tsi yonrhyokawí:nes. Táhnon tsi nahò:ten né:’e aonha’:’a tkenòn:we’s – yeweyén:te tsi teyónkhsnye’s. Akwáh í:ken tsi wakatera’swí:yo. É’tho ok tóhkara niyorì:wake né:’e tsi khenorónhkwa.

Ó:nen wakateryèn:tare oh niyohtyé:ren tsi shé:kon ohstón:ha waká’resen. Yah tha’tewakatskà:hon shiyorhén’ke e’thò:ne tekana’tarà:sere – kowá:nen – ohnennà:ta ó:ni – wà:keke éntye ní:kare. Wa’kahtén:ti tsi tewakyó’te ne yà:yak niyohwihstá:’e e’thò:ne Six Nations Polytech nón:we wà:kehte ne káti ayakwatkenníhsa ne Ohsweken Language Council. Wa’akwáhsa ne tyóhton niyohwihstá:’e táhnon wà:kehre takatskahòn:na tsi teyontskahónhkwa nek tsi akwé:kon kanhó:ton. E’thò:ne sakahtén:ti táhnon tsi nikatonhkárya’skwe sha’katáweya’te, yah tewakè:ron akaterhá:rate ok nahò:ten á:kerihte. Yah ó:ni tewakè:ron akaterhá:rate ok nahò:ten aonsaka’taríha’te, é’tho káti wà:keke tekáksake ne orhen’kè:ne kákhwa táhnon skatshè:ta ne kéntsyonk. Yawekon’òn:ne nek tsi yah eh sótsi tekakhwí:yo.

Táhnon ó:ni yah yohahes tha’tewakatháhkwen ón:wa wenhniserá:te. Wenhniserakwé:kon kitskó:tehkwe táhnon nek ne 3,759 na’tkatháhahkwe – tekahna’néta ní:kon wa’tkatháhakwe ó:ya shithetén:re.

Ó:nen ya’káhewe aonkitáhwha, nek tsi shé:kon ohstón:ha katonhkárya’ks. Tókat nón:wa tsi yekhonnyà:tha yenhén:ke aké:sake nikakhwá:’a...

Nè:ne yonkyenté:ri shikenekenhterón:tahkwe, yakoteryèn:tare tsi niwakatiwénhne. Yah nón:wa. Ohstón:ha wakáre’sen ne karihón:ni sótsi kenà:tarakskwe ne tekahswà:ne nok tewahserí:ye. Wa’kátkahwe tsi í:keks ne teyona’taratsikhè:tare ne akohsera’kè:ne yotohétston táhnon oyé:ri nikakon’tsherá:ke onkwá:ti. É’tho na’á:wen’ne tewenhnì:take tsi náhe nek tsi yah thakkwé:ni sénha ó:ya aonkwá:ti. É’tho káti tewakatáhsawe tsi kátstha ne akwatya’tanha’tsherà:ke ne yonte’nyentenhstáhkwa nè:ne è:neken kayà:tare. Wakhró:ris to na’tekathaháhkwa tsi niwenhníseres. Wà:katste ne thetén:re táhnon wá:ton tsi 7,669 na’tkatháhahkwe tsi niwenhníseres. Yah eh sótsi teyoháhes, ne aorì:wa kítskote wenhniserakwé:kon tsi tkawennárha.

Kenòn:we’s ne kí:ken yonte’nyentenhstáhkwa ne aorì:wa wakehyarakwén:nis tsi tká:konte takatháhahkwe táhnon akatya’takarí:yohste tókat á:kehre sénha aonkwatiwénhake. Táhnon tókat sénha aonsonkwatiwénhake á:re, enwá:ton aonsá:keke á:re ne tekahswá:ne!

Otkon’tsheráksen, yo’taríhen ón:wa wenhniserá:te! Áhsen niwáhsen áhsen niyo’tarihénhne yotohétston néntye. Táhnon ó:ni, tsi niyotón:ris (yohné:kare kawé:rakon) ayonnonhtónnyon tsi kayé:ri niwáhsen énhska niyo’taríhen. Karihwahétken!

Yah tewake’nikonhriyóhne ón:wa wenhniserá:te ahse’kén yah teyoyó’te ne kaweranóhstha tsi tewakyó’te. Táhnon ... sénha wahetkénhne tsi tewakenónhsote. Akwáh í:ken tsi yo’tarihénhne kanónhsakon shonsakahtén:ti né:’e aorì:wa shé:kon tkayén:tahkwe ne kaweranóhstha tsi nón:we wa’kateweyén:ton tsyóhsera yotohétston. Teyotonhwentsyóhon akkóha (tékeni ní:kon) e’thò:ne wa’kéta tsi tewahsonhtakà:ronte. Wa’tekahwihstá:’eke onkyé:nawahste táhnon akwáh í:ken tsi wakya’ta'taríhen, tewak'itónhkwara's táhnon tewakya’tá’tsyonht shiwákhson. Yah tewake’nikonhriyóhne. E’thò:ne wa’kahténtya’te ne kaweranóhstha, wa’katya’tóhare, wa’kátyen ohén:ton tsi tkaweranóhstha táhnon akwé:kon skén:nen nón:wa.

Hátskwe, oh nahò:ten yonnohtónnyon ne kí:ken yakón:kwe?

Táhnon, oh nahò:ten ne érhar wanonhtónnyon?

Rontaweya’tà:nes táhnon rotiyó’tens ne Onkwawenna Kentyohkwa (tsi nón:we í:’i kya’takwe’ní:yo) ne kayà:tare. Yah ní:’i tekyà:tare ne kí:ken ahse’kén wa’kyà:tarahste. Ó:ya shiyò:karahs wa’akwatèn:nyote na káti rotíhson tsi ronteweyénhstha ne kèn:tho. Sha’té:kon niwenhnì:take kén:’en wahontéweyenhste táhnon sha’tewahsén:nen ne kentyóhkwa kén:’en enshontaweya’tà:na á:re.

Enkheya’tí:sake ne ronnónha nek tsi ohstón:ha wakatshennón:ni tsi ronahténtyon ne aorì:wa sénha skén:nen onkwanónhsakon nón:wa.

Wà:kehre akhyá:ton ne "Kanà:taronk nok Yonekwarahní:ron Awenhnísera" aorihwà:ke, nek tsi é:so ó:ya naho’tenhshón:’a niyawén:’on ón:wa wenhniserá:te.

Shiyorhén’ke, wa’kenatà:ra tsi tyohá:te nè:ne skanhotónhkwen Caledonia nón:we. Wa’kheyaterò:roke ne rotiyaneréhson wahatirihówanahte ne káti enkanhotonhkwénhake tsi tyohá:te.

Akwé:kon skén:nen ohahà:ke ne ó:nen wa’kahtén:ti akkóha ne kanà:taronk nok yonekwarahí:ron. Ohstón:ha yotohétston wà:kewe Tsi Yetsyenhayentáhkwa, wa’kerihwà:ronke tsi tehonatateriyohátye ne onkwehón:we nok o’serón:ni Caledonia nón:we. É’tho káti yohsnó:re yonsakató:ri eh nón:we. Yah ónhka teshonaterí:yo eh shà:kewe nek tsi sahatinhó:ton á:re ne tyohá:te. Wa’tsi ok nyá:re, tonsahontaterí:yo á:re ne onkyonkwè:ta rotihskenhrakéhte nok rati’serón:ni. Nè:ne shakotiyé:nas wáhontste ne kahnekáksen nè:ne teyotskà:rare tahshakotí:tenhste tsi tehontaterí:yos táhnon tóhkara nihá:ti wahontkaré:wahte.

E:so níyákyon rotina’khwén:’on táhnon wahón:nehre aonsahonterí:yo á:re. Sha’tekentyohkwí:hen yà:kehte. Wa’kheyé:nawa’se ronatya’kè:son yayakhiya’tà:reke ne onkyonkwè:ta íhsi nón:we tsi thón:nete ne o’serón:ni. Ne ó:nen tayò:karahwe, tóhkara tewennyá:wer nihá:ti ne kanatakonhró:non táhnon onkwehón:we ohahà:ke yehón:nete.

Yah ónhka tehonaterí:yo nón:wa, nek tsi yah ó:ni ónhka skén:nen teyonnonhtónnyon.

Tsyakenì:teron á:re ne Yehnekiyohstha táhnon akwáh í:ken tsi yonkyatshennón:ni kén:’en ayakenè:seke. Áhsen niwenhniserá:ke yeyonkyahtentyòn:ne táhnon wa’akeninaktí:sake ne onkeninónhsa. Orihwí:yo ki ná:’a, wa’akeninaktanòn:we’ne tsi nón:we wa’akyanòn:wete Tsi Tewasenhtha. Enwá:ton ahsatkáhtho è:neken tsi tkayà:tare, ne yontaweya’táhkwa tsi tyohswen’karèn:ton raoná:wenk ne Tsyonontowane’á:ka tsi nón:we wa’akyanòn:wete. Akwáh í:ken tsi yorà:se ok thiwakwé:kon kanónhsakon. Yah othé:nen tewakya’taráhston eh nón:we, é’tho káti karonwarà:ke wa’ketshén:ri ne kí:ken. Á:kehre aesató:kenhse tsi niyorà:se tsi yonnonhwétstha, nè:ne sénha kowá:nen tsi ní:yoht ne onkeninónhsa. Nek né:’e tsyorì:wa nè:ne yah teyakeninòn:we’s – sótsi wákeras tsi yontaweya’táhkwa táhnon tsi teyonthaháhkwa, né:’e aorì:wa enwá:ton ayontshó:ko é’tho nonwéhson.

Tahakwaténnyehte ne kí:ken ne onkyatén:ron, nè:ne Ohsweken nithohténtyon nek tsi Kanà:tsyo thanákere nón:wa. Tsyóhersa yotohétston, akwáh tsi ok nón:we wa’thatawénrye entyè:ke nonká:ti táhnon Peru yè:re’skwe shahonwayà:tarahste. Tóhkara nikaná:take nè:ne thatinákere ne onkwehón:we wahanatá:ra. Kahyonhákta tkaná:tayen ne kèn:tho nè:ne tewahsóntereh ne Amazon tkahyonhatátye. Borah rontatena’tónhkwa ne rononkwehón:we. Orihwakayon’néha ronnonnéhkwa ne ronónha. Roksténha ne onkyatén:ron nè:ne yah tehonyá:kon táhnon e’tho skáhne tehatinonnyáhkwahkwe ne kontiya’tase’okón:’a. Ne ó:nen wa’katkáhtho ne kayà:tare, wa’kanonhtónnyon: "Oh né:’e niyotyé:ren tsi tontahahtén:ti?"

Tyonkeninónhsote ne teyonkenirihwayenawà:kon ne kí:ken kayà:tare. Akwáh í:ken tsi aká:yon – énhska tewennyá:wer yà:yak niwáhsen niyohserá:ke nityó:yen. É:so naho’tenhshón:’a yah teyoyánere tsi tkanónhsote. Tekarèn:re ne tekarontaserényon táhnon akwé:kon teyotshà:kton kanónhsakon. Onhwentsyà:ke tká:yen ne karón:ta, né:’e aorì:wa yohetken’onhátye ohswen’karà:ke. É:so otsi’nonwahshón:’a táhnon takwa’áhson kontinákere kanónhsakon. Táhnon ó:ni, onkwe’tá:ko kontinákere ahsonhtakónhson táhnon tyóhtkon kontitakhenóntyes ne ó:nen kate’nyén:tens aonkí:ta’we.

É’tho né:’e karihón:ni tsi á:se enyakyatenonhsón:ni ne Yehnekiyóhstha (nè:ne teyonkenirihwayenawà:kon). Yákenehre aontayakyatáhsawen ne ensewenhnì:ta tá:we. Í:’i enkeronwaró:ten táhnon enyonkyé:nawa’se ne akhtsikhè:ta. Ayá:wenhse enwá:ton ayakyatenonhsísa ká:ron tsi niyó:re enwà:keren’ne.

Enkayo’tenhserowanénhake, tóhske ki wáhi, táhnon orihwí:yo ki ná:’a, shé:kon á:re enskathró:ri.

Oh káti ní:se, oh nahò:ten sanonhtónnyon tsi yonnonhtónnyon ne yakón:kwe?

O’nihsténha awenhnísera nón:wa táhnon ake’nihsténha nè:ne yayà:tare. Sha’té:kon niwáhsen áhsen na’teyakohserí:ya’ke ó:ya shithetén:re. Shé:kon yakota’karí:te táhnon tyóhtkon yako’nikonhrí:yo. Wakatera’swí:yo, tóhske ki wáhi. Ó:nen skáhne wa’tyakwatskà:hon tsi tyakonónhsote ne akhwá:tsire. (Wa’kekhón:ni táhnon wa’keksoharényon, tókat áhsehre aesató:kenhse.) Wa’akwahwihstarò:roke ne teyakwatate’kén:’a táhnon tayetshí:yon ne wahsiranó:ron nè:ne sha’tewahsohkò:ten ne á:’are nè:ne yorenhtónnyon tsi yonnonhwéhtstha. Akwé:kon skén:nen ne kèn:tho nón:wa. Ayá:wenhse né:’e shà:kat ní:se.

Sénha enwatye’sénhake ayontaterihónnyon ne kí:ken tókat ahstsihkwà:reke ne kayà:tare.