Ratsikhe’tarohrókhes

Thó:ha wisk na’tehaohseriyà:kon nón:wa ne Tekahstaroken (riyateré:’a) táhnon yah nonwén:ton tehotsikhe’tarohrokhónhne Tsi Rontkonhsarhò:roks - tsi niyó:re ón:wa ken’ tsyohsere. Yah tehawè:ren ahatsikhe’tarohrókha né:’e aorì:wa wà:rehre tsi teyotonhwentsyóhon raonhá:’ok tahatawénrye! Ro’nihstén:ha wahonwahró:ri tsi skáhne tahyatawénrye táhnon éhtho ní:yoht tsi wahonwa’nikonhrakwé:ni nahá:yere.

Wahate’nikonhrísa rahswà:tha ahá:ton. Áhsen nikayá:rake ne otsikhè:ta waharó:roke táhnon akwáh í:ken tsi wahaon’wéhskwen. Skatsikhè:ta ok ronwarihwá:wis ne ro’nihstén:ha à:rake o’karahsnéha. Tsi nihotsikhè:tayen, enwá:ton enhatsikhè:take niya’tewahsón:take tsi niyó:re ne ó:ya Tsi Rontkonhsarhò:roks.

Roya'táhskats, wahi?

Tekahstaroken ne kí:ken, riyateré:’a na’ né:’e. Kayé:ri nithó:yen nón:wa. Skáhne teyakwèn:tare nón:wa ne ro’nihsténha (kheyén:’a Karahkwenhawi), Kentenhkó:wa tsi náhe.

Rononhkwiserehs ahse’kén yah tè:rehre ónhka ok ahonwanónhkwaron táhnon tyóhtkon rononhwarò:ron ne thí:ken.

Ohahà:ke wa’akenitshén:ri ne thí:ken kanyáhthen niwá:’a. Wà:kehre tsi ahohteronníhake tà:rahkwe nek tsi yah tóhske té:ken. Akwáh óksa ok wà:trahkwe ne káti ahakena’tónhahse oh nikaya’tò:ten. Wà:kehre á:katste ne kanyáhten ne káti akahstawen’tsherón:ni nek tsi wà:rehre aontatewenní:yo’ne é’tho káti kahyónhakon wa’kátkahwe.