shekon

Sunday, March 28, 2010

Íhsi nón:we ne tsyóhsera yotohétston tsi náhe ok nahò:ten wa’khyá:ton ne kèn:tho táhnon é:so naho’tenhshón:’a niyawén:’on.

Enwá:ton á:katste ne kawennárha tsi tkì:teron nón:wa. Wa’khnyó:ten akenonhsákta ne wa’arowá:nen nè:ne yohsnó:re yah teyoronwá:rote é’tho káti enwá:ton akhyá:ton ne kèn:tho tsi tewakenónhsote. Ayá:wenhse tsi sénha yotká:te enkhyá:ton nón:wa…

Tuesday, February 10, 2009

Kenòn:we’s takewennaté:ni okarahshón:’a nè:ne wátstha kaya’tarahstányon akaká:raton. Wa’ketshén:ri ne kí:ken karonwarà:ke, nè:ne tsi tkaya’tárha nityawé:non. Heroes yena’tónhkwa. Wa’tewáteratste ok wa’katerò:roke táhnon akwáh tsi wa’kenòn:we’ne. Tókat nonwén:ton sénha aonkenaktó:take, á:kehre kakarakwé:kon takewennaté:ni.

Friday, January 16, 2009

Teyotonhwentsyóhon akwahró:ri ne teyó:ya’ks ne:ne wa’akyaterò:roke shisewente’kénha nè:ne “Slumdog Millionaire” yena’tónhkwa. Shayà:ta raksá:’a raorihwà:ke nè:ne Jamal ronwá:yats. Mumbai, India thanákenere táhnon akwáh í:ken tsi ró:tenht, né:’e aorì:wa slumdog ronwana’tónhkwa.

Wahaterahswí:yohste táhnon wahakwé:ni tahatkén:ni tsi wate’nikonhroryà:tha tsi tkaya’tárha nè:ne “Who Wants To Be A Millionaire?” yena’tónhkwa.

Thursday, January 15, 2009

Noyá:! Noyá:!

Karì:wehs tsi náhe wakhyá:ton ne kèn:tho táhnon é:so niyawén:'on nè:ne enwá:ton akathró:ri nek tsi nón:wa á:kehre ok takwatenonhwerá:ton í:se nè:ne sewarónhka ne Kanyen’kéha. Ayá:wenhse tsi akwé:kon skén:nen sewanonhtónnyon táhnon aetsyohseriyóhake ne 2009.