Tyonkeninónhsote ne teyonkenirihwayenawà:kon ne kí:ken kayà:tare. Akwáh í:ken tsi aká:yon – énhska tewennyá:wer yà:yak niwáhsen niyohserá:ke nityó:yen. É:so naho’tenhshón:’a yah teyoyánere tsi tkanónhsote. Tekarèn:re ne tekarontaserényon táhnon akwé:kon teyotshà:kton kanónhsakon. Onhwentsyà:ke tká:yen ne karón:ta, né:’e aorì:wa yohetken’onhátye ohswen’karà:ke. É:so otsi’nonwahshón:’a táhnon takwa’áhson kontinákere kanónhsakon. Táhnon ó:ni, onkwe’tá:ko kontinákere ahsonhtakónhson táhnon tyóhtkon kontitakhenóntyes ne ó:nen kate’nyén:tens aonkí:ta’we.É’tho né:’e karihón:ni tsi á:se enyakyatenonhsón:ni ne Yehnekiyóhstha (nè:ne teyonkenirihwayenawà:kon). Yákenehre aontayakyatáhsawen ne ensewenhnì:ta tá:we. Í:’i enkeronwaró:ten táhnon enyonkyé:nawa’se ne akhtsikhè:ta. Ayá:wenhse enwá:ton ayakyatenonhsísa ká:ron tsi niyó:re enwà:keren’ne.
Enkayo’tenhserowanénhake, tóhske ki wáhi, táhnon orihwí:yo ki ná:’a, shé:kon á:re enskathró:ri.
4 comments:
Kwe kwe owennetekha.... Sanonhsi:io na:'a tahnon tkakonte ahsatenonhsakwatakoha:ton tahnon enhsatenhni:non... enwaton "language house" iensewa:ton'ne ne sanonhsaka:ion' wahe!!!! WATERIEN'TATSHENRIA'TSHERI:IO!!!!
Kattokha ni:'i, tiotkon kanonhtonnions ne waterien'tatshenria'tsheri:ios wahe.. anyway tkakonte ni akahtentionhe... onen ki wahe
Hátskwe Karhowane.
Henh, enwá:ton é:so akakaratónnyon ne kanónhsa tókat akakwé:ni aontá:ti.
Enwá:ton aonsakkwatá:ko nakenónhsa, nek tsi enkanorónhake táhnon yah eh sótsi teyonkenihwíhstayen. Yah árek teyonkyateryèn:tare tsi ní:yoht enyákyatste ne kanónhsa nek tsi orihwí:yo ki ná:’a yah thayákyatste ayakyatkè:ron ne oyén:kwa.
Tahnon nise Tehawennahkwa, enkonhtharhahse watsyok nyare.
Oh nontieren tsi watsiok niare enhsektharhahse??? Trouble-tshera:kon ken kia:ti?? lol, wene tsi,..
onen ki
Post a Comment