Wednesday, September 06, 2006


Akwé:kon ronwayenté:ri ne Tony Soprano, nè:ne raya’takwe’ní:yo ne The Sopranos tsi tkaya’tárha. Tókat yah tetshyenté:ri ne raónha, enkwahró:ri ne kí:ken:


Soprano ronwatí:yats ne kahwá:tsire ne Tarienhá:ka nè:ne New Jersey ratinákere. Tony rotinyá:kon ne Carmella táhnon Anthony nok Meadow ronwatí:yats ne ronwatiyen’okón:’a.
Yah tehronkwe’tí:yo ne Tony – ranénhskwas táhnon shakóryos – nek tsi rohsté:rihst. Thiya’teká:konte tsi ok nahò:ten nihatyérha nè:ne yah teyoyánere nek tsi shé:kon ikhsteríhstha.

Raya’takwe’ní:yo ne kentyóhkwa ne ronnonkwe’táksens ne Tony táhnon ó:ya shithetén:re wahotitó:kenhse ne kentyohkwakwé:kon tsi rótewe ne shayà:ta nè:ne rayà:tare ne kentyóhkwa nè:ne Vito ronwá:yats. (Rótewe: shayà:ta nè:ne raon’wéhskwani ahotítahwe ne ó:ya rón:kwe.) Akwé:kon rotinehrákwen ahotitó:kenhse tsi rótewe ne Vito né:’e aorì:wa ronyá:kon táhnon roksà:tayen. Kentyohkwakwé:kon ronwatíhswenhs nè:ne ronátewe, akwé:kon rotina’khwén:’on táhnon akwé:kon rón:nehre ahonwáryo ne Vito, yah né:’e Tony.

Vito roteryèn:tare tsi akwé:kon ronwatíhswenhs nè:ne ronatewe, táhnon hotina’khwen’ónhake. Tsi na’teho’nikónrhare tsi ahonwáryo, wahatáhsete othoré:ke nonká:ti.


Tyóhtkon tehontatkwénnyons ne ronnonkwe’táksens ne ó:nen tehontátkens táhnon yo’shátste wa’khsté:rihste ne ó:nen shayà:ta ronkwe’táksen wahorihwanón:tonhse ne Tony, "Entshekwénnyon ken ne Vito ne ó:nen tenthoké:tote?"

1 comment:

Owennatekha said...

Hatskwe Karhowane

Oh niyohtonhátye ní:se nón:wa? Ayá:wenhs ne káti skén:nen sanonhtónnyon kenh wenhniseratényon.

Wa’tkonnòn:weron tsi wahsekhró:ri sewawén:na “ronón:onwa”. Sateryèn:tare ken tsi nón:we nityawé:non ne ró:onwa / ronón:wa?

Oyé:ri niyohserá:ke tsi náhe, ne ó:nen takatáhsawen akeweyentéhta’ne ne Kanyen’kéha, wà:kehre aonkwateryèn:tarahkwe oh níyoht aya’ì:ron ne "gay". Akwé:kon wa’kherihwanón:tonhse ne kèn:tho oh ní:yoht aya’ì:ron. Akwé:kon tahatirihwserá:ko ne káti yah teyonkwawén:nayen. Nè:ne otiksten’okón:’a wa’onkhró:ri, wa’konnì:ron: “Wahonnise’kénha, yah teyonkyonkwe’tayén:tahkwe nè:ne gay niyonkwe’tò:ten, né:’e aorì:wa yah teyonkwawén:nayen nón:wa.” E’thò:ne tsyeyà:ta akoksténha wa’onkhró:ri tsi yóntstha “rótewe” nok “yakótewe” ayonthró:ri ón:kwe nè:ne gay niyonkwe’tò:ten. Táhnon, tsi ní:yoht tsi wahsekhró:ri, wa’onkhró:ri tsi “rótewe” ne kèn:ton ónhka ok nè:ne thiya’teká:konte royéhson.